Competéncia e responsabilitat

La cronica Midi Libre dau Joan Loís Blenet

sus ràdio Lengadòc. (picatz sus l'image)

  Competéncia es lo mot totèm per parlar das collectivitats e definir lor accion. Se ditz pas jamai qu’an de responsabilitats. Aquò’s pro curiós e questionant. La competéncia es un saupre-faire, un saber (mai o mens gai) dins un domeni. Es tanben una virtualitat, una potencialitat, pas una obligacion. Es plan atau que lo monde l’emplegan per la vida-vidanta : « Lo collèga es competent en informatica, te poirà ajudar ». Lo tonton qu’es competent per endormir los nenons a pas obligacion d’o faire pertot ont passa, e urosament per el pecaire ! 

La lenga administrativa o confirma plan. La competéncia generala, que sola la comuna a servada, es la possibilitat d’accion dins totis los domenis fòra d’aqueles reservats a l’Estat : armada, justícia… Vegèrem las competéncias partejadas, domenis que las collectivitats an caduna possibilitat d’accion, mas ges d’obligacion.
Per dire una obligacion nòstre país cartesian inventèt un monstre lexicau, la competéncia obligatòria. Atau es imperatiu pel departament de bastir los collègis, per la region los licèus. Evidentament que la competéncia es obligatòtia, autrament serià dangierós per joves e professors. Mas aquò fai que jamai s’emplega lo mot just de responsabilitat qu’es reservat a l’Estat. Atau n’es de la consideration d’aqueste pels ciutadans.
Traduction à retrouver sur Midilibre.fr