Lo papet bom-bom !

 La guinhada de l'IEO34 sus ràdio Lengadòc (en picant sus l'image)

Diga ! Un còp èra, en 2019, quand arribèt la gastapiana chinesa nos diguèron qu’anàvem dintrar dins lo temps dau papet bom-bom. Efectivament, a la debuta aquò descanilhèt a ronfle dins los EAPADs e autres moritòris de papetum. Puòi, vos sovenètz ?, quand n’aguèrem enfin, las masquetas venguèron obligatòrias. Mas el, lo Bernat se’n batiá. Senhorejava sus lo vilatge d’enaut sos 2 mètres sens la cargar, fièr e mespresós de la lei. Bon, tot despenja-figas qu’es, s’agantèt un parelh de prunas.

Aprèp, i aguèt lo vaccin que mens fòrt que l’aiga bolida nos sauvèt pas la vida. Pensatz coma mon reborsièr d’amic i corriguèt. Te dintrèt dins de rasonaments qu’es pas res d’o dire, que passèt el per las escòlas grandas. Vertat es que quand comencèt de trabalhar èra ja clòsca-pelada d’a fons, tant talament es intelligent…

E l’autre ièr, qual te vese pas sus la plaça ? Lo Bernat, emmasquetat amb una masqueta tota nòva. Se vesiá de luònh qu’èra lo sol a la cargar dempuòi qu’es pas pus obligatòria e que la sieuna de masqueta sortissiá dau tirador, tota polida, plan alisada..

-        Macarèl, Bernat, que t’arriba ? As agantat lo virus ?

-        Lo virus ? Lo virus es una faula dau govèrn per melhor mestrejar los Innocents de Niana coma tus ! Non, cargue la masqueta en causa que m’estofe quand siái enrodat de mond vaccinats… Se ditz lo vaccin shedding, son tas excrecions vaccinalas que m’enfectan e me fan tossir.

-        E ben, mon salòp, te vau dire ont las te cau metre mas excrecions…

 

Vòls que te diga ? Ara, quand me vei se voda a Nòstra Dòna de las cambas coma se portave la ronha ; camina de nuòch o jos lo cobèrt dau mercat ancian per èsser pas filmat per l’aucelilha que, es plan conogut, los aucèls son totes de camèras e t’afortís que la tèrra es plata dau moment que i a lo bot dau monde a Sant Guilhem… Es a cercar l’autre bot. Mas conoisserai pas ieu l’insofrible bonaür de veire mon amic guierdonat dau prèmi nobèl qu’ai lo malastre de m’èsser fach vaccinat, e doncas quand ausiretz aquela guinhada aurai saique plegat parpèla. L’amic intelligent me diguèt qu’aniriái pas luònh e que passariái pas lo crivèl de la seleccion naturala.

Rai, ma votz de velors resquilharà sus las ondas per l’eternitat, d’un bot a l’autre de la tèrra, mercé ràdio Lengadòc.

Enfin es çò que ne dise, ieu...

 

La guinhada de l’IEO34. E, rau !