Los esquiroductes

 La guinhada de l'IEO34 sus ràdio Lengadòc 

Picatz sus l'image i tombaretz.

Diga ! Aqueles que coma ieu barrutlan dins Erau, e… rau !!! auràn pas mancat de remarcar, mercé fòrça reclama, pancartassas de fèrre que t’agarisson la vista e te manjan los païsatges, los ponts per los esquiròus meses en plaça per lo Departament. Esquiroductes que dison ! Se tracha pas mai que d’una còrda tibada entre dos aubres bèlses per ajudar los esquiròus a traversar la rota en tota securitat. Bòta, son pas installadas subre las autorotas o quatre vias, tanpauc sus la plaça Esquiròl en plen Tolosa o dins las vilas que vòtan ecolo, que bèl temps fa que coma rosigaires an pas pus que de ratasses de toats. Fan puslèu dins lo tunèu que dins lo pont, a la vila ! Non, non, los pontilhs son sus las rotetas, las que serpatejan dins lo campèstre e los bòsques dins de ròdols que lo monde saupèron resistir e dire de non als promotors.

Me faretz pas dire qu’es pas una causa bona qu’aqueles esquiroductes mas me demande ieu se caudriá pas tanben metre en òbra de teleferics per los singlars qu’un parelh de còps m’arribèt de ne tustar un quand lo solelh trescòla. Vos conte pas, èran ja trocejats per l’adòba los singlars e la veitura de mal petaçar…

Vòls que te diga ? Fin finala, i pòde tornar a la caça au singlar e lo finir a de bon lo carri, qu’aprene uòi qu’au mes de julhet ma veitura, la melhora Peugeòt de totes los temps !, 340 000 quilomètres au comptador, aurà pas pus lo drech de rotlar au Clapàs, tròp vielhanchona. Me pensave que lor municipi èra per lo desvolopament duradís, mas non, m’enganave. Figuratz-vos que lo cònsol ecolo d’aquela vila s’imagina qu’es per empudessinar sa vilassa e li ofegar los paumons que càmbii pas ma vièlha cranca… E, parla pas de me pagar la veitura electrica, aquel grand farandelàs !

Òu, me venon ara aleiçonar mas me l’embetumèron a de bon, de cap a cima, mon polit Clapàs. Caçat d’en çò mieu, paure de ieu, me demòra pas que coma Baron de Caravetas d’i anar a chival se vòle contunhar d’i donar corses d’occitan.

 

Enfin, es çò que ne dise, ieu.

 

La guinhada de l’IEO34. E, rau !