PAPIERÒT MENERBÉS (in La Semaine du Minervois, 03/02/22)

 Vacanças a Eivissa

Los mots son plan malauts. Unes pèrdon la canturla e arriban a dire causas complètament falordas o d’una contradiccion fonsa, i comprés dins las bocas de monde plan ensenhat.

- Al trabalh : Del fin fons de sa residéncia de vacanças a las Balears, lo ministre de l’Educacion explica a totes los ensenhaires que lor i cal èsser a pè d’òbra que qu’advengue e, qu’en mai de lor mestièr educatiu, lor i cal faire de trabalhs de medecina e de polícia (contraròtle dels furga-nas), sens parlar de totes los papièrs o formularis d’emplenar. Las sesilhas de lectura son de remplaçar per unes moments de deschifratge de sa darrièra circulara (manòbra de capitar lèu-lèu abans l’arribada de la seguenta). Excusatz, me cal anar banhar los artelhs dins las ondadas maritimas…

- Vacanças laboriosas : L’explica del ministre blanquinèl val lo còp : pas de problèma a son auséncia del burèu, vist que trabalhava a distància. Alara, aquela es de primièra : se mancava pas de trabalh, francament vesèm pas perqué èra en vacanças. E quand li demandaràn quora prendrà vertadièrament de vacanças, respondrà probablament : « Las preni assetat dins mon burèu al ministèri ! » ??
 

- Nuclear : Doblidadas las catastròfas de Three Mile islands, Chernobil o Fukushimà ; pas de question de se pausar sul tractament dels degalhs radioactius ; pas de lagui de se faire suls subredepassaments de còsts de la centrala de Flamanvila : a l’Euròpa son a decidir que l’energia nucleara es verda e pròpra. E vos parli pas de la candidata a la presidenciala que vòl pas brica utilizar l’energia dangeirosa del vent…

- La còsta que davala e la remontada que cabussa : Lo brave Monteborg sa remontada s’es arrestada a la vista de sa davalada dins los sondatges. La vida politica es pas doça coma la mèl.

- Al restaurant : La lectura dels menuts de restaurant resèrva totjorn quauqua suspresa bèla. Atal, d’aquel establiment de Carcassona que vos prepausa un caçolet, plat tradicional lengadocian, acompanhat de… sa sièta de ris !!!? E qué pensar del « caçolet vegan » (sabi pas s’es una recèpta tradicionala) anonciat dins una aubèrga de Ciutat. Tal autre acompanha una carn d’una « purèa de trufada » !

- Nutri-marca contra lo bon gost : La Nutri-marca (en fr. : nutri-score) es sensada indicar la qualitat nutritiva dels aliments de A plan bona a E missanta. Es talamant plan faita e plan establida qu’arriba a una bèla paradòxa : unes produits industrials ultra-transformats amb elements conservators aquí-ne-vòls-aquí-n’as passan per malhas e se’n tiran amb una A o una B ; produits que respondon a biaisses de faire tradicionals, qu’an de reconeissenças d’AOP o IGP se trapan amb la mai missanta classificacion : E pel Ròcafòrt. Semblariá que i age quicòm que truca dins lo sistèma. Destapa-me la cantina de muscat de Sant-Joan per acompanhar aquel brave talhon de Ròcafòrt qu’espèra pas que l’ataca de mon cotèl de Laguiòla…

- A l’ostal : S’èra estat vaccinat, lo Djokovic auriá saput qu’« A Melborna, qual i va, s’entorna » !

Balear Roch