PAPIERÒT MENERBÉS (in la Semaine du Minervois, 20/01/22)

 Lo papieròt de l'Alan es sus ràdio Lengadòc.

I tombaretz en picant sus l'image.

Brassens seriá mòrt ?

Lo Jòrdi Brassens que, dins lo revolum de celebracions d’aquò e de quicòm mai, se celebrèt los cent ans de sa naissença l’an passat, m’aprenon que seriá mòrt e mai mòrt !

Sustot avançan que sos mots e sas rimas serián pas mai de sason. Qué volètz anar caçar los parpalhòls alara que los pesticidis an rendudas inutilas las agulhas per los puntar sus un tablèu de siure ? Perqué prononciar una non-demanda de maridatge en temps de maridatge per totes e de divorcis multiples ? Los cirques an pas mai de zoò : impossible qu’un gorilha se’n escape! I a pas mai d’amoroses suls bancs publics ont es plan malaisit de s’assetar e encara mai de s’apiejar. Cresètz qu’un Auvernhàs vos balharà un còp de man o que valdrà mai trepejar dins la tropelada a la pòrta del Restaurant del Còr ? La marrida reputacion l’auretz pas al vilatge : tres messatges falsièrs sus Morre-de-boc e vòstre compte serà bon ! Seriá plan estonant que l’Ofici de Torisme de Seta pèrde tres plaças sus la sabla de la Cornicha per un cementèri personal. Lo vendeire de paratron demòra a l’ostal, fa sa propaganda sul Net e, probable, que susvelha la femna amb quauqua camerà o besonha electronica. Margòt poirà plan descranconar lo casabèc, serà pas grand causa dins las èrsas d’imatges marcats X, o Y o Z ! Pòdes plan èsser pornograf, mas ont trapar un fonograf ? Sul radèl de la Medusa, comptar suls collègas en primièr es pas faire pròva de separatisme rapòrt a l’anar de la societat ? Amb la multiplicacion dels vira-l’ase e de las rocadas, vai-te’n saupre qual es lo pont que sufís de passar ! Qunas batèstas te caldrà menar per salvar un arbre, ametlièr o garric, quand serà folzejat o que dintrarà pas mai dins la planificacion d’urbanizacion que pren en compte la mesa en plaça de falses espacis verds ? L-214 te tombarà sus l’esquina se cridas : « Mòrt a las vacas ! ». Qual se carcanha al jorn d’ara per saupre se la messa es en latin o dins una autra lenga de la granda Babèl ? Lo temps fa plan quicòm a l’afar que tantes e tantas son a córrer de longa (per ont e perqué : aquò’s una autra question). Se trapas una font d’aiga clara, serà ja encantinada per la vendre al prètz d’una blanqueta de Limós. Del moton de Panurgi, pas possible de ne parlar al singular (e cal èsser plan singular per creire que lo plural val pas res !) que lo paure s’es demultiplicat. E tu, Jòrdi, èras plan nascut endacòm, non ? Malaisit de morir per d’idèias quand las idèias novèlas son ja vièlhas l’endeman. Per contra, vertat, que quand los cons son cons e ben ! demòran cons (Mas en çò nòstre, lo mot pòt èsser d’amabilitat e de complicitat !)

Anem, fin finala, coma vosaus, serai (se Covid ba vòl plan) aqueste dissabte 22 de genièr a 6 e mièja del vèspre, sala Na Loba a Puègnautièr, per escotar lo Felip Carcassés e son grop Còrna d’Aur’Òc nos regalar de las versions en lenga d’Òc del grand Jòrdi. Per çò que sabèm plan que la musica, la cançon, la poesia, l’èime… lo temps pòt pas aver presa sus eles !

Setòri Roch