La cronica Midi Libre dau Joan Loís Blenet
Lo vocabulari es sempre una aisina de poder. La suspicion de nacionalisme portaire de totes los pecats imaginables es de longa emplegada contra los militants das lengas istoricas del país. Aquò justifica l'accion d'eradicacion das diferentas lengas autoctonas que sens relambi mena França.
La guèrra actuala que torna dins l'actualitat lo mot e la question de l'imperialisme, a lo meriti de far soscar.
La remirabla resistencia daus ucrainians espanta lo monde. Se baton per que vòlon existir coma pòble, es a dire coma personalitat originala e diferenciada. Aquesta lucha es clarament nacionala emai nacionalista.
S'enfrentan a Russia qu'es enfin plan vista per çò qu'es, un Estat menat per una volontat imperialista.
Cau remarcar que d'un biais generau l'imperialisme se ditz pas nacionalista mas civilisant. Atau lo Potina vòl « desnazifiar » Ucraina, e per el « l'ucrainian a ges de rason d'èsser ».
Aquesta guèrra mòstra que la reivindicacion nacionala d'una originalitat es pron legitima. Es la daus basques, escosseses, catalans...
Çò qu'es perilhós, çò qu’es perilhós es l'imperialisme, es a dire la volontat de dominacion d'una nacion. E sabèm plan l'apetís sens limit de l'imperialisme. Rementam nos que nòstra França republicana se trapava legitima de conquistar lo Tonkin, lo Vietnam, qu'avián vocacion d'èsser nòstres !
Un empèri a jamai d'indigestion. S'arrèsta sonque quora es atancat.
Cap comentari:
Publica un comentari a l'entrada